Thou's welcome, wean, mischanter fa' me,
If ought of thee, or of thy mammy,
Shall ever daunton me, or awe me,
My sweet wee lady,
Or if I blush when thou shalt ca' me
Tit-ta or daddy.
Wee image of my bonny Betty,
I, fatherly, will kiss and daut thee,
As dear and near my heart I set thee
Wi' as gude will
As a' the priests had seen me get thee
That's out o' hell.
What tho' they ca' me fornicator,
An' tease my name in kintry clatter:
The mair they talk I'm kent the better,
E'en let them clash;
An auld wife's tongue's a feckless matter
To gie ane fash.
Sweet fruit o' mony a merry dint,
My funny toil is now a' tint,
Sin' thou came to the warl asklent,
Which fools may scoff at;
In my last plack thy part's be in't
The better ha'f o't.
An' if thou be what I wad hae thee,
An' tak the counsel I sall gie thee,
A lovin' father I'll be to thee,
If thou be spar'd;
Thro' a' thy childish years I'll e'e thee,
An' think't weel war'd.
Gude grant that thou may ay inherit
Thy mither's person, grace, an' merit,
An' thy poor worthless daddy's spirit,
Without his failins;
'Twill please me mair to hear an' see it
Than stocket mailens.
Address To An Illegitimate Child.
Robert Burns
(1)
Poem topics: father, funny, heart, kiss, poor, war, wife, april fools, dear, grant, tongue, fruit, hear, person, spirit, lady, talk, merry, matter, sweet, Print This Poem , Rhyme Scheme
Submit Spanish Translation
Submit German Translation
Submit French Translation